اعتقد ان العرب المسلمين الوحدين الي مش عارفين الفرق بين Christmas و New year's Eve و New year's day
كلهم اعياد دينية مسيحية اخر اتنين نفس الشيء لكن في اسمين مختلفين.
مش هتكلم عن تفاصيل و اصل الأعياد دي .. هتكلم عن دولة مثلا زي امريكا وهي دولة مهاجرين .. حاليا بقي يُفضل تقول Happy Holidays بدل Merry Christmas دة لو انت ليبرالي/يساري/او حد بيحترم معتقدات الاخرين وفي طبعا جدل ومناقشة كبيرة حصلت عن الموضوع دة هناك.
مافيش مسلم، يهودي، مسيحي "من طوائف اخري" بيحترموا دينهم و بيحتفلوا بعيد الميلاد "الكريسماس" الي هو شجرة و بابا نويل .. حتي ان في يهود بيتعمدوا عدم الإحتفال في الايام دي بالذات ولا هدايا و شجرة وطبعا اهم حاجة انهم مايربوش عيالهم علي فكرة بابا نويل و الهدايا والي حتي في مسيحيين مؤمنين بعيد الميلاد بدئوا يتناقشوا في موضوع بابا نويل علي انه كذبة وماينفعش نربي عيالنا عليها.
تقدروا تدخلوا علي مواقع كبيرة زي امازون امريكا و ابل امريكا مش هتلاقوا مثلا Christmas gifts لا هتلاقوا holiday gifts او holiday shopping او holiday deals
علي العكس في إنجلترا هتلاقوا Christmas gifts علي ابل في نفس الصفحة والتصميم وكل حاجة .. الموضوع بيختلف من دولة للتانية حسب ديمغرافية وثقافة كل بلد.
ولو حد متابع سياسية امريكية هيكون شاف ترامب وهو بيقول في احد مؤتمراتة الشعبية قبل الانتخابات .. ان تعبير ميري كريسماس اختفى! علشان بيقولوا انه Politically incorrect
*ودة تعبير معاناة انك تكون بتقول كلام بدون النظر مين هيحس ان تم اهانته لو قولته لمجموعة من الناس مؤمنه بدين معين مثلا او جنس بحالة زي الرجال او النساء او مثلا فئة من الشعب زي المُقعدين.
وكمل ترامب حديثة انه قال لمراته ماتشتريش حاجة من اي محل من الي بيقولوا اعياد سعيدة دول و انه هيرجع تعبير ميري كريسماس تاني لو تم انتخابه رئيس .. طبعا كان بيلعب بمشاعر المسيحيين المحافظين الي هما قاعدته الانتخابية.
كمان الإحتفال برأس السنة احتفال ديني مسيحي .. اسمها السنة الميلادية (التقويم الغربي او التقويم المسيحي) واحنا لينا تقويم هجري اسلامي وكل دين عنده تقويمه .. وفي الليلة دي المسيحيين في دول كتير بيحضروا قداس منتصف الليل.
ماعتقدش ان في مشكلة ان غير المسلمين ياكلوا كنافة في رمضان مثلا وان المسلم يبتهج كدة لما يلاقي الدنيا منورة و اشجار و فرحة حوالية دة شيء طبيعي انساني مش مخالف للدين علي حد علمي.
لكن نشر فكرة شراء الشجرة وتزينها بين المسلمين و اطفالنا يتعودوا علي دة واية يعني نتصور معاها وبابا نويل و الهدايا وتمييع الموضوع و اضفاء "عادي" عليه دة يعتبر تضليل وطمس لهوية ناس كتير مش مسلمين بس.
مش معني ان الرأسمالية العالمية علي مر السنين استغلت عيد الميلاد علشان تحشر فيه شراء الهدايا وغيرة انه مابقاش عيد ديني.
هتلاقوا انفلونسرز و مشاهير كتير مسلمين بيجيبوا الشجر ويزينوا و هدايا لاطفالهم دول معظمهم بيروج للهدايا نفسها واخدين فلوس علشان يخلوكم تشتروا الهدايا دي .. ناس تانية مشاهير بيعملوا كدة مفكرين انهم كدة بيندمجوا مع المجتمع الغربي الي عايشين فية زي محمد صلاح .. الباقيين مجرد هُبل بيقلدوا الافلام و الغرب وخلاص.
أنا فاكر اول ما جيبت تركيا لاقيت ورق اعلانات ملزوق في حتت كتير في الشوارع بيحذر من بابا نويل و الاحتفال بالكريسماس وانه مش من الدين .. كنت مستغرب!
اخيرا انا مش بقول تبقى ماشي تلاقي صديقك المسيحي او زميل عمل في الكريسماس وتروح مكشر في وشة!! لا اطلاقنا دة مش دينا بقى .. لكن "عيد سعيد" بإبتسامة من القلب هتكون من الدين و بإذن الله ناخد عليها حسنات كمان حسب نيتنا لكن بدون احتفالات او تغير اي شيء من نمط يومنا في الايام دي طبعا .. لو بقى تعرفوا حد مسلم من الي بيجيبوا الشجرة و بابا نويل و الهدايا و واخد الباكدج كلها من الافلام دة كلموه بود وعن محبة لو تعرفوه طبعا .. ان دة مش دينا.
موسم أعياد سعيد و أمن من الكورونا علينا كلنا يارب.
انا مش عامل البوست دة للنقاش يعني الي عايز يعمل حاجة يعملها والي شايف اني غلط ماعنديش مشكلة و الي شايف اني متطرف عادي و الي شايف اني بفرض علي الناس رأيي! اعمل للصفحة بلوك علشان ترتاح!
﴿ وَلْتَكُنْ مِنْكُمْ أُمَّةٌ يَدْعُونَ إِلَى الْخَيْرِ وَيَأْمُرُونَ بِالْمَعْرُوفِ وَيَنْهَوْنَ عَنِ الْمُنْكَرِ وَأُولَئِكَ هُمُ الْمُفْلِحُونَ ﴾ [آل عمران: 104]